Franćesko Toti nije svojevoljno završio karijeru u Romi 2017, prošle godine je revoltiran napustio klub nakon što je imao funkciju u upravi…
Kako za takvu legende nema mjesta u klubu kojem je poklonio veliki dio života? Odgovor zna Toti – za mnogo toga je kriv predsjednik kluba Džejms Palota.
“Dok god je u Romi stanje ovakvo kakvo je sada, neću ući u Trigoriju (Romin trening kamp). Svaki put kad dovedem sina Kristijana na trening, ostanem ispred kapije. Nekada samo sjedim u automobilu, čini mi se kao da ću zaplakati. Da poslije 30 godina u Romi ne mogu da uđem…”, kaže Toti.
Posljednjih godina igračke karijere je imao nesuglasice sa trenerom Lućanom Spaletijem, kasnije dok je bio direktor se nije slagao sa Palotom i Frankom Baldinijem…
“Govorili su mi da ću donositi odluke, a onda su me pomjerili u stranu. Razočarao sam se, za Romu sam dao sve. Da je trebalo, i nogu bih dao”, ističe Toti.
Sjetio se i vremena kada je na neki način natjeran da završi karijeru.
“Osjećao sam se dobro, nisam želio da prekinem. Nisam tražio da stalno budem na terenu, niti sam vršio pritisak na nekog. Samo sam želio da i dalje budem dio svlačionice, da pomognem treneru i da prenesem iskustvo mlađima. Kad god sam ulazio u igru, atmosfera na “Olimpiku” bi se zapalila, to bi svima bilo od koristi”, navodi Toti i dodaje:
“Kada sam vidio da je došao kraj u Romi, nisam želio da idem bilo gdje i odigram jednu sezonu. Odlučio sam da se povučem, iako sam znao da mogu još da igram”, zaključio je Princ Rima.