Najtraženiji model u 2019. bila je jedna Honda koju nemamo prilike da vidimo na našim putevima.
Japansko tržište automobila veoma je specifično jer se u toj zemlji prodaju brojni modeli koje ne možemo sresti u drugim državama. Riječ je o takozvanim “kei” mikroautomobilima, koji su praktično prevozno sredstvo za pretrpane japanske megalopolise, gdje je svaki kvadratni metar parking prostora dragocijen.
Domaći proizvođači u Japanu prodaju veliki broj kei modela, a jedan od njih, Honda N-Box, najtraženiji je automobil u toj zemlji već treću godinu uzastopce.
N-Box je 2019. završio sa rekordnih 253.500 isporučenih primjeraka čime je ponio titulu najprodavanijeg modela u prošloj godini.
Honda N-Box kao model postoji od 2011, kada je lansirana prva generacija ovog vozila. Nasljednik, i aktuelni model, stigao je 2017, i od tada je najtraženiji auto među kupcima u Japanu.
Honda je za nepunih devet godina prodala ukupno 1,7 miliona ovih vozila.
Cijena bazičnog modela N-Box u Japanu startuje od 1.411.300 jena (oko 11.600 evra), dok najskuplja verzija N-Box Custom košta 1.996.500 jena (oko 16.400 evra). Kupci takođe mogu da doplate i pogon na sva 4 točka, koji dodatno podiže cijenu ovih vozila.
Pored modela N-Box, Honda u Japanu prodaje i druge kei automobile, kao što su N-One, N-WGN i roudster S660.
Kategorija kei automobila uspostavljena je 1949. Prema najnovijim regulativama iz 1998, kei automobili ne smiju da imaju motor preko 660 “kubika”, dok snaga pogonske jedinice može da iznosi najviše 64 KS.
Dodatno, auto ne smije da bude duži od 3,4 m niti širi od 1,48 m.